Mga Karapatang Panlipunan na tinatamasa sa aming Lalawigan

Ang aking pamayanan ay nabibilang sa Rehiyon 4-A, ang CALABARZON, partikular sa lalawigan ng Cavite. Ito ay ang lungsod ng Dasmariñas. 

Maituturing na isang progresibong lungsod ang aking pamayanan at dahil dito, natutugunan nito ang iba’t-ibang karapatang panlipunang dapat tamasahin ng mga mamamayang nabibilang sa iba’t-ibang sector ng lipunan nito.

          Unang-una na ang karapatan sa trabaho. Napakaraming establisyemento, mga pabrika at pagawaan na nag-eempleyo sa mga mamamayan sa Dasmariñas. Ang bilang at  laki ng populasyon nito ay nagbibigay din ng oportunidad sa mga tao upang kumita sa pamamagitan ng kalakalan at pagnenegosyo

Sa larangan naman ng edukasyon ay hindi pahuhuli ang Dasmariñas. Para sa mga batang nasa unang taon ng pag-aaral ay may Day Care Center ang bawat baranggay.

Napakaraming pampublikong paaralan mapa-elementarya man o sekondarya sa iba’t-ibang barangay. May state college din na nakatutugon sa pangangailangan ng mga mag-aaral sa kolehiyo na walang kakayahang magbayad sa mga pribadong paaralang pangkolehiyo.

Para naman sa may mga kakayahang magbayad ay marami ding pagpipiliang mga pribadong paaralan mula sa elementarya hanggang kolehiyo.

Ang siyudad ng Dasmariñas ay nagbukas din ng ospital na tumutugon sa pagkakaroong ng maayos na kalusugan ng mga naninirahan dito. Ito ay ang Pagamutan ng Dasmariñas.

Bukod pa dito ay may mga  health center din na matatagpuan sa mga iba’t-ibang  barangay upang tumugon sa mga pangunahing pangangailangan sa kalusugan.

Sa iba’t-ibang komunidad ng Dasmariñas ay makikita ang mga pabahay o subdivision para sa mga nais manirahan at magkaroon ng sariling bahay.  May mga maaayos ding kalsada na patungo sa mga pabahay na ito.

Ang mga pamilihan sa Dasmariñas, malalaki o maliliit man ay may sapat na dami ng suplay ng mga pagkain para sa mga mamimili. Ang mga produkto ay nagmumula sa mga magsasaka sa pamayanan at sa mga karatig na lalawigan at lungsod.

Sa aspeto naman ng karapatan sa tubig, masasabi kong ito ay natutugunan   sa aking pamayanan. Nariyan ang Dasmariñas Water District na pangunahing tumutugon sa pangangailangan ng mga mamamayan. May mga poso din o deep well sa malalayong lugar na di pa naabot ng serbisyo ng DWD.

Mula sa aking mga nabanggit, masasabi kong magandang mamuhay sa aking pamayanan dahil naibibigay nito ang mga pangunahing pangangailangan ng mga taong naninirahan dito. Natatamasa nila ang mga karapatang panlipunan  na dapat nilang makamit.

Simple theme. Powered by Adam's Blogger.